Menyu
Gayane Umerova o‘zini O‘zbekistonda madaniyat sohasini rivojlantirishga bag‘ishlagan
O‘zbekiston Madaniyat va san’atni rivojlantirish jamg‘armasi raisi va Prezident Administratsiyasi Ijtimoiy rivojlanish departamenti rahbari o‘rinbosari sifatida Gayane Umerova mamlakatning madaniy infratuzilmasini yaratish boshqaruvida turibdi. Uning sa’y-harakatlari millatning san’ati, rassomlari va madaniy merosini jahon diqqat-e’tiboriga olib chiqmoqda. Hozirda u Toshkentdagi Zamonaviy san’at markazini qayta ta’mirlash va rivojlantirish ishlariga rahbarlik qilmoqda, ushbu markaz mintaqaning yangi madaniy jozibador markaziga aylanishi kutilmoqda. Shuningdek, u boshqa salmoqli layohalar qatorida Tadao Ando tomonidan loyihalashtirilgan yangi Davlat san’at muzeyi qurilishini boshqarmoqda va 2024-yil oktabr oyida bo‘lib o‘tadigan Kreativ iqtisodiyot bo‘yicha Butunjahon anjumaniga mezbonlik qiladi va O‘zbekistonning Expo 2025 Osaka ko‘rgazmasida ishtirok etish bo‘yicha komissari hisoblanadi.
O‘zbekistonning xalqaro madaniy sahnadagi mavqeini oshirishga intilib, Umerova YUNESKO ishlari bo‘yicha O‘zbekiston Milliy komissiyasi raisi va 2021-yil Venetsiya biennalesida O‘zbekiston milliy pavilioni komissari sifatida faoliyat ko‘rsatib kelmoqda. Uning jamoat xizmatiga sodiqligi yoshlar uchun imkoniyatlar yaratish va jamiyat hamda avlodlarni birlashtiruvchi madaniy iqtisodiyotni rag‘batlantirishga qaratilgan.
Butun faoliyati davomida Gayane Umerova O‘zbekiston san’atini dunyo sahnasi pog‘onasiga ko‘tarish ustida tinimsiz mehnat qilib kelmoqda. U O‘zbekiston san’ati va madaniyatining ilg‘or ko‘rgazmalarini dunyoning nufuzli muassasalarida tashkil etish hamda yirik xalqaro rassomlarning asarlarini O‘zbekistonda namoyish etishda hal qiluvchi rol o‘ynagan.
Umerova rahbarligida O‘zbekiston madaniy merosi ilk bor 2022-yilda Luvr va Arab dunyosi institutida taqdim etildi. 2023-yilda Berlindagi Jeyms Simon galereyasida arxeologik osori atiqalari ko‘rgazmasini tashkil qildi, Xitoyda ikki ko‘rgazmani o‘tkazdi va Doha dizayn biennalesiga “Hunarmand O‘zbekiston: tolalardagi an’ana” olib bordi. “O‘zbekiston: sahrodagi avangard” doirasida “Nur va rang” va “Shakl va ramz” ko‘rgazmalari Uffitsi galereyasi va Ka Foskari muzeylarida namoyish etildi. O‘zbekiston madaniyati va merosiga bag‘ishlangan yangi peshqadam “Ipak yo‘llari” ko‘rgazmasi esa 2024-yilning kuzida Britaniya muzeyida ochilishi rejalashtirilgan.
Umerova “Genri Mur: Grafika ustasi” (2015) va “Yangi o‘tmish: Britaniya zamonaviy san’ati” (2016) ko‘rgazmalarini O‘zbekistonga olib kelishda ham muhim rol o‘ynagan. U 2012-yilda O‘zbekistonning Nukus shahridagi Savitskiy muzeyida Christie’s bilan hamkorlikda o‘tkazilgan ilk o‘zbek zamonaviy san’ati auksionini boshqargan.
Avvalroq Umerova O‘zbekiston san’at galereyasida bosh kurator sifatida faoliyati yuritgan va yetakchi jahon auktsion uylari Christie’s va Sotheby’s bilan hamkorlik qilgan. Shuningdek, u 6-Toshkent xalqaro zamonaviy sanʼat biennalesiga kuratorlik qilgan.
Gayane Sotheby’s san’at institutida san’at biznesi ixtisosligi bo‘yicha magistrlik darajasiga ega va Oksford universitetida antropologiya doktoranti bo‘lgan.