Buxoro biyennalesi doirasida kelajakdagi Jadidlar merosi muzeyi loyihasi taqdimoti bo‘lib o‘tdi. Ushbu noyob tashabbus mashhur livanlik me’mor Lina Gotme tomonidan ishlab chiqilgan.
Muzeyning ochilishi 2027-yilga mo‘ljallangan bo‘lib, u Usmon Xo‘jayevning uyida, qadimiy Labi-Hovuz majmuasida joylashadi. Bu tarixiy qasr jadidchilik harakati bilan chambarchas bog‘liq bo‘lib, aynan shu maskanda ma’rifat va madaniy yangilanish g‘oyalari shakllangan. O‘z davrining ruhi saqlanib qolgan bu inshoot Buxoroning tarixiy to‘qimasida muhim o‘rin egallaydi.
Muzey sifatida qayta jonlangan ushbu uyda ko‘rgazma zallari, arxiv va ta’lim maydonchalari bo‘ladi. U tarix va bugunning tutashgan nuqtasida yangi ilmiy va madaniy izlanishlar markaziga aylanishi kutilmoqda.