Kecha Alisher Navoiy nomidagi O‘zbekiston Davlat akademik katta teatrining sahnasida "Xon Sulton. Oltin O‘rda"ning kutilgan va tantanali milliy premyerasi bo‘lib o‘tdi. Mazkur asar Qozog‘istonning Abay nomidagi Davlat akademik opera va balet teatri tomonidan taqdim etildi. Rejissyor Davide Livermor yaratgan keng ko‘lamli sahna yechimlari va Xamit Shangalievning jo‘shqin, obrazli musiqasi tomoshabinlarni go‘yo Oltin O‘rda davrining ruhi va nafasi hukmron bo‘lgan olamga yetakladi. Asarda hokimiyat, taqdir, an’ana va yangilanish o‘rtasidagi murakkab munosabatlar teran badiiy ifodasini topdi.
Aktyorlarning mahoratli ijrosi, sahnadagi hissiy kuch va spektaklning o‘ziga xos ohangdor muhiti ushbu premyerani poytaxt madaniy hayotidagi yirik voqealardan biriga aylantirdi. Bu ijodiy hamkorlik xalqaro madaniy muloqotni rivojlantirish yo‘lida muhim qadamlardan biri sifatida ham e’tirof etildi.