O'rik Gullaganda (When Apricots Blossom) — O'zbekiston Madaniyat va san’atni rivojlantirish jamg'armasi (ACDF) raisi Gayane Umerova tashabbusi bilan tashkil etilgan immersiv ko‘rgazma bo‘lib, u Milan Design Week 2026 doirasida Palazzo Citterioda taqdim etiladi.
Mashhur o'zbek shoiri Hamid Olimjon she’ridan ilhomlangan ushbu ko‘rgazma umid, yangilanish va bardoshlilik mavzulariga bag‘ishlangan. Installyatsiyalar, maxsus buyurtma asosida yaratilgan yangi dizayn ishlari hamda jamoatchilik dasturlari orqali tashrif buyuruvchilar Orol dengizi mintaqasi va Qoraqalpog‘istonning boy madaniy merosi bilan tanishish imkoniyatiga ega bo‘ladilar. Bir vaqtlar dunyodagi eng yirik ko‘llardan biriga makon bo‘lgan ushbu hudud so'nggi o'n yilliklarda keskin ekologik o'zgarishlarni boshdan kechirgan bo'lsa-da, mahalliy jamoalar o'z madaniy an’analarini saqlab qolish va ularni zamonga mos ravishda rivojlantirishda davom etmoqda.
Me’mor Kulapat Yantrasast kuratorligida tashkil etilgan ko‘rgazma mintaqa kundalik hayotining uch muhim unsuriga — to'qimachilik, taom va boshpana — bag'ishlangan sayohat sifatida namoyon bo‘ladi. Rang-barang to'qimachilik installyatsiyalari, an’anaviy o'tovning zamonaviy talqini hamda o'zbek hunarmandlari bilan hamkorlikda yaratilgan maxsus non patnislari orqali namoyish etilayotgan asarlar hunarmandchilik an’analari qanday qilib avloddan-avlodga bilim, o'zlik va xotirani yetkazib kelishini ochib beradi.
Ko'rgazma uchun o'n ikki nafar xalqaro dizayner yangi asarlar yaratgan. Ular orasida Bethan Laura Vud, Bobir Klichev, Didi NG Wing Yin, Fernando Laposse, Markin Rusak, Nifemi Markus-Bello, Sanne Visser va Sevara Haydarova Donazzan, shuningdek Glithero, Studio CoPain hamda Raw-Edges dizayn studiyalari bor. Dizaynerlar O'zbekiston hunarmandlari bilan yaqindan hamkorlik qilib, yog'och, ipak, sopol, kigiz va qamish kabi an’anaviy materiallardan foydalanib, mahalliy hunarmandchilik bilimlariga tayangan zamonaviy talqinlarni yaratganlar.
Ko'rgazma bilan bir qatorda tashrif buyuruvchilar Jamg'armaning Orol dengizi mintaqasida madaniy va ekologik muloqotni rivojlantirishga qaratilgan uzoq muddatli tashabbuslari — Orol madaniyat sammiti va Orol maktabi kabi loyihalar bilan ham tanishishlari mumkin. Dizayn, hikoya qilish va hamkorlik orqali O'rik gullaganda madaniy meros barqarorlik, hamjamiyat va kelajak haqidagi yangi qarashlarni shakllantirishga qanday ilhom berishi mumkinligi haqida mulohaza yuritish imkonini taqdim etadi.
Ko'rgazma haqida ma’lumot
Tashabbuschi: Gayane Umerova, O'zbekiston Madaniyat va san’atni rivojlantirish jamg'armasi (ACDF) raisi
Kurator: Kulapat Yantrasast, me’mor, WHY Architecture asoschisi va ijodiy direktori
Dizaynerlar: Bethan Laura Vud, Bobir Klichev, Didi NG Wing Yin, Fernando Laposse, Markin Rusak, Nifemi Markus-Bello, Sanne Visser, Sevara Haydarova Donazzan, shuningdek Glithero, Studio CoPain va Raw-Edges dizayn studiyalari
Ko'rgazma sanalari: 2026 yil 20–26 aprel
Joy: Palazzo Citterio, Brera
Manzil: Milan, Italiya