Toshkentda an’anaviy san’at ta’limi rivojida yangi sahifa ochildi. 5-oktabr kuni “Naqsh” hunarmandchilik maktabi O‘zbekiston Madaniyat va san’atni rivojlantirish jamg‘armasi hamda Qirollik jamg‘armasi An’anaviy san’at maktabi hamkorligida ishlab chiqilgan ikki yillik kunduzgi diplom dasturining ilk talabalarini qabul qildi.

O‘zbekistonning boy badiiy va me’moriy merosiga tayangan dastur nazariy ta’lim, amaliy izlanishlar va hunarmandchilik mahoratini uyg‘unlashtiradi. Geometriya, naqsh va rang, kulolchilik, xattotlik, naqqoshlik hamda yog‘och o‘ymakorligi kabi yo‘nalishlarni o‘rganish orqali talabalar ko‘p asrlik an’analarni zamonaviy ijodiy amaliyotda davom ettirish uchun zarur bilim va mahoratni egallaydilar.